Facer bonu l'empate de Leganés, ganar nel Carlos Tartiere y que'l públicu colara pa casa con una sorrisa pol trunfu. Con eses tres premises encaró'l Real Oviedo la xornada 17 en LaLiga Smartbank, na que los de la capital del Principáu recibieron al SD Amorebieta, con victoria azul por 2-0.
El Cuco Ziganda punxo en tema un once formáu por Femenías; Carlos Isaac, David Costas, Dani Calvo, Pierre Cornud; Viti, Brugman, Jimmy, Borja Sánchez, Samuel Obeng y Borja Bastón.
La primer metá, de claru dominiu oviedista, empezó con un Real Oviedo que fízose col balón, metiendo tras al Amorebieta, qu'intentaba salir con balones llargos para la disputa de los sos homes n'ataque. Viti, bien atináu nel apartáu ofensivu, punxo'l 1-0 con un bon disparu dende dientro de la área. Siguía'l Real Oviedo buscando abrir distancia nel marcador, y fízolo con Borja Sánchez como protagonista. L'uvieín anotó con una cabezada, en segunda xugada tres un balón paráu, un nuevu gol para los de Ziganda. Col 2-0 llegóse al descansu.
Tres el pasu por vestuarios, los vascos dieron un pasu adelantre, intentando retayar distancies, esfrutando de quince minutos bonos de xuegu. El Real Oviedo reaxustóse y volvió facese col control, teniendo delles ocasiones para poder facer mayor la renta. Pombo y Sangalli fueron los primeros cambeos de Ziganda, Jirka y Luismi en segundu términu, y Arribas la última sustitución.
Tres puntos importantes de los azules nel Carlos Tartiere, onde'l Real Oviedo vuelve a la sienda de la victoria con un gran partíu del equipu.
