Y el Real Uviéu volvió ganar. L’equipu volvía al Carlos Tartiere depués de dos xornaes lloñe del municipal uviedín, y de la última derrota de La Romareda, y fíxolo pa firmar un partíu seriu énte la so afición, con una victoria que caltién al conxuntu uviedín a les puertes de los play off d’ascensu.
Col cambéu de Carlos Martínez por Mossa, el Real Uviéu recolocó a Johanneson en banda y a Bárcenas na esquierda. El prau aguantó perfectamente y el conxuntu uviedista tamién na primer llegada del Cádiz, qu’atayó Champagne enriba de la raya. Respondía Carlos Hernández, anotando l’un a cero, al refugue de Cifuentes depués de saque d’esquina, emburriando nel segundu palu. Poníase per delantre’l conxuntu uviedista y d’él siguieron siendo les ocasiones de la primer metá. Primero nun remate de cabeza de Joselu qu’unvió fuera y depués nun centru xu de Folch que raspió en Johannesson y aparó’l meta del Cádiz. Llegaba l’empate nel minutu 40, obra de Machís, y al Real Uviéu el xingón fíxo-y responder en forma de gol. Depués d’una gran xugada de Bárcenas pela esquierda, Cifuentes tornó’l so disparu y Johannesson llegaba al refugue p’anotar a placer el dos a un definitivu.
Na segunda metá inda diba quedar enforma que correr y bregar. Machís tuvo una ocasión clara que volvió afrellase con un gran Champagne. Llegaron entós otres dos ocasiones clares pal Real Uviéu, primero con un bon disparu de Bárcenas que buscaba la escuadra y qu’a puntu tuvo d’esmucíse-y a Cifuentes, y depués con un remate de Joselu xirando sobre sí mesmu que volvió aparar el porteru cadista. Folch probaba suerte tamién al refugue, xutando dende la frontal, pero volvió aparar Cifuentes. Entraron Javi Muñoz, Ibra y Jorge Mier, y Joselu tuvo la más clara unviando fuera un bon centru de Johannesson dende la derecha, en remate de cabeza.
El Tartiere ayudó a los sos nos minutos finales y los trés puntos volvieron quedar en casa. L’equipu va volver al trabayu’l martes a les 10:30 h n’El Requexón.
