Xugábase nel Wanda, pero l’azul apoderaba. El segundu gran desplazamientu masivu de los aficionaos uviedistes nun tuvo, desgraciadamente, un final feliz.
Anquela apostó pol 4-3-3 de xornaes anteriores, camudando al respective de la postrera, y volviendo dar entrada a Javi Muñoz nel mediu del prau. Los averamientos na primer media hora de partíu foron del Real Uviéu, con remates primero de Joselu y depués d’Aarón, en dos ocasiones, que tornó la defensa local. Saúl tuvo la más clara a puntu de ser el descansu, pero tamién unvió fuera. Nun pasó apuros l’equipu d’Anquela nos primeros cuarenta y cinco minutos, presionando bien la salida de balón de los locales.
Depués del descansu, el xuegu del Rayo Majadahonda ameyoró, y el Real Uviéu tuvo que s’esforciar más en defensa que n’ataque, rompiendo’l partíu con un dir y volver de contino que nun beneficiaba a los d’Anquela. De nuevo’l remate foi d’Aarón, parando’l porteru local. Los centros nun atoparon remate y, con too y con eso, l’equipu uviedista marchaba con un puntu del Wanda. Pero en tiempu añedíu y en xugada a balón paráu, el Rayo anotaba’l gol que-yos diba dar el trunfu a los madrilanos. De vacío y cola tristura de nun poder brindar una allegría a l’afición.
L’equipu vuelve a Uviéu pa volver entamar los entrenamientos el martes a les 10:30 h n’El Requexón.
