El Real Uviéu llegó a un alcuerdu pa facese colos servicios del estremu eslovenu Matej Pucko, pa les dos temporaes vinientes.
El xugador, de 23 años d’edá, nació’l 6 d’ochobre de 1993 en Murska Sobota, Eslovenia. Depués d’un pasu pel NK Alumninji, incorporóse al Koper, equipu del qu’agora llega procedente, desque militó cedíu una temporada nel Osasuna, na 2015-16, onde anotó cuatro goles.
Internacional Sub 21 con Eslovenia, Pucko xugó un total de 11 alcuentros col combináu de la categoría del so país, y participó na lliga española nun total de 31 partíos en Segunda División, nel so pasu pel club navarru, onde s’enfrentó al Real Uviéu nel últimu alcuentru lligueru, nel que foi titular, clasificándose Osasuna pal play off y llogrando l’ascensu a Primer División.
Matej Pucko ye un estremu que davezu compite na banda derecha, pero pue xugar en cualquier posición d’ataque. Ente les característiques qu’hai que destacar del xugador ye que se trata d’un futbolista rápidu, trabayador, pervertical nos movimientos y con bona definición.
El futbolista eslovenu va incorporase nel intre a los entrenamientos, depués de sometese esta mañana a reconocimientu médicu na Clínica Asturias, y va trabayar a les órdenes de Juan Antonio Anquela na sesión d’esta tarde pa tar a disposición dafechu del técnicu de la qu’empiece la temporada.
Trayectoria:
(2011/15) NK Aluminji
(2015) Koper
(2015-16) Osasuna
(2016-17) Koper
La presentación oficial de Matej Pucko como xugador nuevu del Real Uviéu va facese mañana a les 13 h nel Carlos Tartiere.
El xugador nun va facer declaraciones hasta’l momentu de la so presentación oficial.
