La sala de prensa del Carlos Tartiere acoyó esti mediudía la rueda de prensa de presentación de Miguel Pérez Cuesta, “Michu”, como nuevu secretariu técnicu del Real Uviéu.
L'uvieín tuvo acompañáu pol presidente de la entidá, Jorge Menéndez Vallina, quien destacó que "y damos la bienvenida a la so casa, tamos contentos de que vuelva. Siempre digo que les grandes empreses amás de talentu piensen en grandes persones, y equí tengo a una.”
Pela so parte, el nuevu secretariu técnicu empezó reconociendo que "faime muncha ilusión tar equí, ye un honor volver a casa. Siempres dixi que tuvimos en contactu y toi equí para ayudar al Real Oviedo. Toi feliz de volver a casa, ye un honor. Tuvi en contactu con Joaquín y tresmitióme que yera la mio casa, que tenía les puertes abiertes. Surdió la oportunidá pola salida d'Ángel y equí toi.”
Sobre lo que supon la so vuelta al Real Oviedo, Michu reconoz que “esti ye'l mio equipu, una responsabilidá extra. Ye una ilusión que tengo, volver tar equí ye bien importante. Formeme. Agora tócame trabayar n'otra faceta, ayudando al club. Ye un retu importante.”
Tocantes a cómo ve al equipu de cara a esta últimu tramu de temporada, l'uvieín destaca que "conózolos, tengo bona relación col míster. El Real Oviedo tien opciones de competir pa xubir. El mio primer partíu como trabayador ye contra Les Palmes y al ver a la xente entrar con llárimes nos güeyos faime tar contentu y tranquil. Les opciones son reales y creo que se van a lluchar. Les valoraciones fáense a la fin. Tenemos opciones reales de competir en Primera y vamos estrumiles. Vamos dir partíu a partíu, trabayamos pa encarar la final de Córdoba.”
Entrugáu pola so esperiencia y cómo afecta esto a la so día ente día, Michu cree que “la esperiencia nun garantiza nada. Ye ciertu que tengo poco, pero si la esperiencia garantizara daqué, equí habría xente de más edá.” Amás, sobre'l trabayu realizáu por Ángel Martín, l'uvieín entiende que “hai un gruesu de la primer plantiya anovada, ta perbién fechu. Hai coses sobre la mesa, pero toca esperar. Falten ocho xornaes y confío en xugar play off y tar en categoría cimera. Ángel ye un profesional como la copa d'un pinu, estimo'l so trabayu.”
Ante una posible vuelta de exoviedistes como Cazorla, Mata o Adrián, el secretariu técnicu reconoz que “son grandes futbolistes, pero tán en competición europea. Tienen les puertes abiertes y sería un honor que vinieren, pero creo que queda un pocu llueñe.”
A la entruga de la posible renovación de Saúl Berjón, Michu confirma que “tien contratu, yá que robló va dos temporaes equí, y pa la próxima temporada tá a valir.”
Sobre'l so equipu de trabayu y les posibles incorporaciones, l'uvieín cree que “hai qu'analizar, pero ta funcionando bien. Tamos abiertos a tou, ye importante esperar. L'añu que vien hai opciones d'algamar otra categoría, confío enforma n'ellos.”
Finalmente, de cara a la duración del so contratu, Michu señala que “equí toi como en casa y cuando vea que nun pueda ayudar diré a la mio casa”, sentenció'l carbayón.
AST
