Principió la metá primera con un Real Oviedo bien afitáu en defensa y con más llegades de los llocales. Champagne y la zaga azul fixeron perbién la so xera y el primer tiru a puerta foi de Ramon Folch a la rebatina, que garró Nadal. Probó llueu Bárcenas nún llanzamientu curiosu que marchó penrriba y'l porteru oviedista sacó bien un tiru llocal. La más nidia foi de Bárcenas, faltando cinco pa'l descansu, nún centru perbonu de Johanneson que tocó cola tiesta, pero que-y quedó atrás cuando entraba nel áerea pequeña.
Na segunda parte'l Real Oviedo tuvo los sos meyores minutos y atopábase meyor cada vegada nel terrén de xuegu, con un remate d'Alanís que restalló nel palu nún córner. Entraron Ibra y Omar Ramos dende'l bancu y otra vegada un remate oviedista atopaba la maera y al porteru Nadal, que l'unviaba a córner. Entraba darréu Viti y'l Real Oviedo preparóse p'aguantar los cinco minutos caberos, onde apretó enforma l'Albacete ensin llevar más premiu que'l empate.
L'equipu torna a Uviéu n'autobús. El so entrenamientu siguiente va ser el martes a les 17:00h nel Requexón.
AST
