Cola alcordanza pa la familia d’Edu Cortina y de Gabri Piquero pol fallecimientu de los sos padres, con un Tartiere puestu de pies, empezó un partíu difícil pal conxuntu uviedista.
Bárcenas volvía al once nel sitiu de Johannesson y al conxuntu uviedista diba costa-y safase de la presión del Alcorcón nos primeros cuarenta y cinco minutos. Muncha intensidá de los de Cristóbal Parralo, anque ensin ocasiones, nel primer cuartu d’hora de partíu, estorbando la posesión de balón pal equipu d’Anquela. Con una seriedá defensiva impecable, l’equipu d’Anquela recompúnxose a la media hora de partíu, con un axuste d’esquema dende’l bancu, pasando a defensa de cuatro y dexando a Javi Hernández nun sitiu más adelantáu. Al descansu diba recomponer pieces el técnicu uviedista.
Cola entrada de Johannesson en cuenta de Javi Hernández, el Real Uviéu foi ganando en llegada de la que pasaben los minutos. Más cómodu’l conxuntu azul nel terrén de xuegu, y con más averamientu al área d’un Alcorcón que nun inquietó la portería uviedista en nengún momentu. Medraba l’equipu d’Anquela y traducíase n’ocasiones. Bárcenas tuvo la primera clara nun cabecéu a centru de Johannesson qu’unvió fuera por poco.Tamién de cabeza remató Carlos Hernández a balón paráu, pero esviao. Entró Javi Muñoz al terrén de xuegu y llegaron los meyores minutos pal Real Uviéu. Volvía ser protagonista Johannesson nun gran remate de cabeza, a centru de Christian Fernández, que marchaba raspiando’l llargueru. Entró Ibra en cuenta de Yoel, y poco depués llegaba’l gol de Tejera. De nuevo a centru de Christian Fernández, el mediocampista catalán unviaba al fondu de la rede un balón colgáu al segundu palu, que cabeciaba énte la so marca poniendo’l que diba ser l’un a cero definitivu. El Tartiere emburrió a los sos cuando más lo precisaron.
Victoria con dedicatoria de los xugadores enseñando’l dorsal 30 d’Edu Cortina nel mediu del prau, pa sumar trés puntos más y allargar la racha tan positiva del Real Uviéu. L’equipu va volver a los entrenamientos el llunes a les 17:00 hores n’El Requexón.
