Con tres cambios nel once titular, l'equipu oviedista espachó una de les meyores primeres partes de la temporada, anque ensin gol. Diba ser na segunda metá cuando los de Anquela sentenciaríen el partíu, p’allegría del Tartiere, con un marcador que fizo xusticia a un bon Oviedo, que tornó cuando se lu esperaba.
Saúl Berjón, Mossa y Joselu, amás de Folch dempués de cumplir sanción, volvieron al once titular. La primer metá pasó, de principiu a fin, con una posesión del 70% pal'equipu de Anquela, que foi dueñu y señor del control del xuegu. Faltó-y al conxuntu oviedista presencia nel área, como’l primer centru de Mossa que buscaba a Joselu nel área namás entamar el partíu. El Nàstic ganaba al conxuntu oviedista n'altor, pero non en dominiu del balón. Viti tenía una ocasión nel minutu 25 de partíu, con un chut forzáu, prácticamente dende la llinia de fondu, que Bernabé despeyaba a córner. Pocu más tardi, un disparu de Javi Muñoz dende la frontera estrellaríase nel llargueru envelenándose al raspiar nún defensa del conxuntu catalán. Siguió intentándolo’l Real Oviedo, con un bon pase de Bárcenas ente llinies que buscaba'l movimientu de Joselu. L'ariete remataba dempués, pero porriba. Saúl sacaba un bon centru, en cantu del descansu, que nun algamaren a rematar nin Viti nin Mossa. Y Champagne intervenía pa facer la única parada de la primer parte, con un disparu alloñáu del Nástic, qu'unviaba a córner el meta oviedista.
Na segunda metá baxó la posesión oviedista, pero llegaron les ocasiones, y los goles. Joselu anotaba, de cabeza, a centru de Yoel Bárcenas nun gran movimiento del ariete oviedista na primer ocasión de la segunda parte. Xubía l'unu a cero nel marcador y llegaben llueu otros dos acercamientos oviedistas. Un centru rasu de Mossa al área pequeña que despeyaba la zaga catalana, y un disparu de Saúl Berjón qu'atrapaba Bernabé. Probó suerte Bárcenas con un disparu rasu que se coló esviáu, y Joselu, primero con una chilena que yera complicada y dempués con un bon llanzamientu que colaba raspiando'l llargueru. De siguío llegaben los meyores minutos del Nàstic. Salió Johannesson, en cuenta de Viti, y dempués Ibra en sustitución de Bárcenas. El Real Oviedo trabayó impecable en defensa, en dellos córners consecutivos, y Champagne volvió apaecer. Sentenciaba entós Christian Fernández, nun gran remate de cabeza, tres un bon llanzamientu de falta de Saúl Berjón. Col dos a cero terminaba'l partíu, que'l conxuntu oviedista supo lleer y remanar prácticamente de principiu a fin, pa ser despidíu con un apurrimientu grande d'aliendu de l'afición del Carlos Tartiere.
L'equipu va volver a entamar el trabayu mañana, a les 10:30 hores, n'El Requexón.
AST
